黑糖南瓜年糕

 

今年有不少人問我會唔會整糕，

當時心想：吓?  我 ? 整糕?   

哈... 原來我呢兩年將以前 "無飯主婦" 嘅形象成功洗左底 ^^

 

好，本來冇打算整糕嘅我，

今年就整人生第一個年糕，

送比娘家同奶奶

 

今次我決定整 "黑糖南瓜年糕"，

食譜我跟 yanomi 嘅

 

今早煎左幾件試味，

好好食，同埋，口感超級軟糯，

我喜歡 ^^

 

 

未煎之前嘅樣子

 

清蒸糯米飯

 

 

我家係水上人，爸媽以捕魚為生，

年幼時每當爸爸回航時我地幾兄弟姐妹總會登上魚船爭取同爸媽相聚...

 

當時避風塘有小艇叫賣粉麵，同清蒸糯米飯，

每當我地見到或聽到，

一定大聲叫小艇靠近我地，

然後每人講出自己心頭好，

船隻搖擺不定，冇枱冇櫈，

但仍然樂在其中...

 

爸爸退休後，自然地冇左呢啲機會品嚐，

聽講呢類粉麵小艇亦買少見少了...

 

人越大了就越想回味，

雖然坊間有食肆提供 "避風塘食品"，

卻只有粉麵，價錢昂貴之餘，亦非兒時嘅美味...

 

要數我最最最愛嘅，非 "清蒸糯米飯" 莫屬，

只係簡單咁淋上甜鼓油，灑上蔥花，花生，

已經好味到不得了 ^^

 

今晚，終於忍唔住整黎食，配鴛鴦腸，

天寒地凍下食呢個糯米飯真係冇得輸，

只係希望... 個胃唔好投訴啦 :p

 

 

 

 

 

同場煲左個 "木瓜雪耳海底椰湯" 比我同老闆潤一潤 ^^ 

牛油小卷

 

再戰牛油卷，

上次啲出品有啲嚇人，

一直都耿耿於懷...

 

噚日終於的起心肝 "復仇"，

今次啲出品樣子好多了，

細細個，脹卜卜，

喜歡 ^^

 

 

呢幾日早餐有著落了 :)

 

 

 

 

 

 

 

 

壞習慣

 

 

 

我有一個 "壞習慣"，

天氣有多冷對我黎講都唔係問題，

但每當天氣回暖我就會病倒，

我... 真係怪人一個！

 

上星期中回暖的某一天，

朝早落床時感到天旋地轉，

响咁嘅情況下，當然邊度都唔使去，

被老闆 "軟禁" 在家 =.="

 

今日見悶悶地，

攞部相機同新成員 "薄荷仔" 影番啲相，

感覺上有番啲生氣  :p

 

 

我愛薄荷嘅味道，

用佢黎沖水或蜜糖茶，

我亦愛用佢黎做餅面裝飾，很美  :)

 

 

 

我想快啲好番呀 )))))))

開心‧其實好簡單

 

 

又係小餐包，

用佢黎配甚麼都可以，大愛！

 

今日瞓醒精神好好多，

見我家老闆又要出差，

所以整個豐富嘅早餐過佢嘆完至出門 :p

 

 

 

呢個係我嘅，

早餐我最愛蛋沙律配麵包，

來一杯香濃咖啡，滿足 :)

 

好友數年前送我的新屋入伙禮物 ~ 咖啡機，

以前忙於工作未有用心去研究，

只知街外的好喝得多...

 

這年留家時間多了，

開始去搜尋資料如何炮製一杯美味嘅香濃咖啡...

 

終於，我成功了！

在家原來也可以喝一杯跟街外差不多的咖啡，

原來，開心其實好簡單 ^O^

 

 

 

白粥炒麵

 

噚晚見喉嚨有啲作怪，

即刻啪藥、瞓覺，

今日起身覺得好啲，不過就好攰囉...

 

晚餐唔想食街外野，

簡簡單單整左白粥炒麵，

清清地不錯呢...

 

 

米用鹽同油醃左成個鐘至煲，

唔使冇厘味道咁寡 :p

 

 

 

呢排天氣好易令人中招，

所以大家都要小心身體呀！

 

 

石澳大頭洲

 

呢個週末好健康，

噚日行完 "谷埔"，

我家老闆今日話有啲唔夠喉，

見佢咁講，咪再同佢行個 hea 山囉...

 今日揀左去石澳大頭洲 :)

 

 

 路經石澳村村屋

 

 

天氣好，但天色仍是不好...

 

一大班人攀石中

 

濛糊的大浪灣

 

夕陽醉了...

 

 

 

 兩日行程雖然唔激烈，

但小腿酸痛程度都有番咁上下，

無鬼用... > <"

鹿頸 ~ 谷埔

 

近年每元旦日都會選擇郊遊，

取其義 "新年行大運"，

又可親親大自然...

 

今年 1 月 1 有要事，改為 1 月 4 進行，

今次揀左 "谷埔" 呢個地方，

由鹿頸出發...

噚日天氣不錯，但煙霞頗為嚴重 :(

 

 

谷埔的路段全都沿著海岸線，很好行...

 

 

谷埔村已荒廢嘅村屋、學校

 

村裡有一大片蘆葦田，很美！

 

 

回程時日落景色

 

整段路都好悠閒，寧靜，

遠離繁囂...