2017年3月15日 星期三

班蘭戚風蛋糕


成人見人整班蘭蛋糕,心思思又想試下,
今日問老闆想唔想食,
佢話好喎...

收到 order 即去街市專賣泰國野嘅小店買左兩札班蘭葉,
然後加牛奶同椰奶打爛,隔渣留汁,
留番平時做戚風嘅份量

一路整嘅過程都好香...


純天然嘅顏色 ^^
好香好軟,個人認為好味過星加坡出名嘅手信 :p


成日冇出街,見又齊料,
再焗多一盤餐包做早餐


今次係 12 格,成盤變哂矮仔 > <


呢幾日天氣唔知想點,
天陰,大風,毛毛雨,潮濕...咩都齊...
搞到行唔到山  > <"

天氣快啲好啲啦,please......

2017年3月4日 星期六

榕樹灣 ~ 菱角山 ~ 索罟灣


上星期見天文台話前幾日會好好天,
所以一早約定好友去行個山,
舒展下筋骨 :)

以往對南丫島啲行山路徑有誤解,
以為只係得一條由榕樹灣去索罟灣嘅路線,
感覺沒甚麼特別,始終唔响選擇內,
好彩最近留意左啲行山友嘅面書,
原來南丫島都有山可攻頂,
做左功課,唔難行,
又相對安全 (始終得幾個女人麻)...


呢日响中環搭 12:00 船,
入到榕樹灣仲要 hea 食左個 light lunch,
然後施施然起步...


初段都係平路,過左洪聖爺灣開始上山,
終於出到啲汗 ^^
呢樹有個 "加油站",
大多數人都會响樹抖抖再起行,
呢日天朗氣清,可惜始終都有少少煙霞 ...


好快就行到去索罟灣


我地就响索罟灣嘅天后宫右側再上山,
因我地今日目的地係菱角山

再上山沿路指示不足,心想有咩唔對路,最多沿路折返,
呢段路需經過一段墓地,
穿過墓地就見到山上涼亭,
見到涼亭心情即刻安樂哂 ^^

景觀好舒服,樓景日日望,
所以我行山較喜歡揀啲望到海景嘅路線


响樹曬下太陽影下相,爽!


幾個酒鬼行完山又點會唔啤啤佢吖


hea 下,傾下,又到回程時間,
join 埋啲老公們一齊食個晚飯至散 band,
係盡興嘅 ^O^



最近懶打埋呢樹,但生活冇懶,
有煮飯同焗蛋糕比老闆食,
只係冇响呢樹 update,
但我有睇你地嘅 blog 架,
希望我快啲返番黎,唔好等呢樹了冇生氣啦 :)


最唔想見到嘅事終於發生左,
唔係自己能力範圍以內可解決嘅事,
好心痛 ... (放心,唔係我身體出事 :p) 
不過,幸好有個好錫我嘅老公,
响呢段時期扶住我,心靈上照顧我,
我還是感恩的 :)





2017年1月27日 星期五

蘿蔔糕


一拖再拖,
終於年三十 (即今日) 動工整蘿蔔糕,
洗洗切切連蒸嘅時間其實都唔算耐,
可能我有 mum 5 同蒸爐幫手...

今次玩多啲花臣,
一部份蘿蔔我手切有粗,幼條,
其他用 mum 5 刨絲,
所以食起黎有啲啲層次 :) 



每年都係簡簡單單插幾支劍蘭,
一對桔 + 一個 hea 到爆嘅全盒 ^^


祝大家新年快樂,雞年大吉大利,身體健康!

2016年12月11日 星期日

慢煮 "西班牙黑豚豬梅肉义燒"


又中毒了 ...

近幾個月自己睇開嘅網頁總會有 "慢煮捧" 嘅出現,
一直都覺得呢支棍唔係自己杯茶,
煮中餐多嘅我會好少用到佢...

唔知點解越唔理越唔睇,
啲資訊總係會湧埋黎,
跟住就自言自語咁覺得其實中餐都有好多地方用到佢喎 
(好明顯女人買野係有佢自己嘅理由)...


身邊唔少人,包括自己,
好鬼鐘意食义燒,
出面嘅一係唔好食,好食嘅又貴...
買呢支棍最大原因都係可以整到啱自己同屋企人口味嘅义燒 ^^

噚晚有朋友上黎食飯,
就胆粗粗試整喇,
為求成功率大啲,
買左舊靚肉黎整...
全程一路整一路留意,
終於成品不錯喔 ^O^

好味,肉好淋,加上我用蜜芽糖掃面再焗,
第一次就做到自己想要嘅效果...


今次唔夠焦,下次會焗耐啲燶啲香口啲...


收棍當日,試機整溫泉蛋,
又成功 XD


一句講哂,呢支棍好好玩,
冇買錯 ^^


好耐冇 update 呢樹喇,
懶到冇朋友...
早前同老闆去左紐西蘭 11 日,
希望自己有耐性執下啲相同大家分享下 :)





2016年11月14日 星期一

秋葵 ‧ my little garden


我同老闆都喜歡食秋葵,
年頭買左包種子諗住自家種,
點知冇左件事,
終於兩個幾月前醒起將種子落泥...

每日都望下佢地有冇生長,
日日望日日諗點解仲未有喜嘅?

終於前兩星期發現佢開花,
知道開花就會有結果...
真係架,朶花謝左就會出秋葵架 ...
(不過開花同花謝係好短時間,幾個鐘嘅事,所以 3 次都影唔到)


呢隻就係我地第一隻自家種秋葵喇 ^0^
超級開心呀,跟住同自己講,
得一隻,睇黎要切薄片,然後炒蛋,
珍而重之將佢成為一味餸菜 :D


呢隻係第 3 隻,好 bb (第 2 隻唔記得影 :p)


近鏡好多毛毛 (巧打意呀)


不過可能我地比佢個環境唔夠寛敞,
所以秋葵數量好少,
住新界村屋嘅朋友同我講佢嗰盆多到食唔切喎... @@

唔緊要,自家種,多與少,都好開心,食得放心 ^O^

2016年11月2日 星期三

咖啡抹茶三色戚風蛋糕


原來真係會嘅,
一係唔玩,一開始玩溝色就成日心思思想再玩...
自從上次個雙色後,
好想快啲再玩,終於今晚有飯局,
有哂藉口開壇啦...


今次呢... 係冇進步嘅,
依然咁矮小,啲窿多過上次,同大過上次 :p


雖然又係唔靚仔,
但佢始終有內在美,仲幾好味添 ^^

溝色戚風最好玩嘅地方,
就係落糊時好隨性,脫模時望到嘅花紋係會點...


嚴格黎講呢兩個溝色戚風嘅外型我唔係太接受,
但好 enjoy 過程,真係幾好玩架 :)


今晚係好友 m 小姐生日飯局,
因同主角太熟,所以直情問佢飯後想吃咩甜品,
呢幾隻味道係佢落嘅 order,
佢仲話唔好搞咁多野,唔使刎 cream,要原汁原味...
就咁,呢個就成為佢今晚嘅生日蛋糕喇 
(不過比我切開左研究左先 lu :p)

m, happy birthday to you ah xx


我呢兩個溝色戚風,响焗爐裡嘅進展係不錯嘅,
正常地扒高,但最後幾分鐘,突然會回縮...
請問,我邊 part 做錯左?
(單色我未試過有咁嘅情況的) 


2016年10月22日 星期六

抹茶雙色戚風蛋糕


一直唔敢玩雙色戚風,點解??
因實在太了解自己喇,
冇耐性、怕煩、粗手粗腳...

點知今朝起身,
腦袋第一個彈出黎想做嘅事,
竟然係雙色戚風 @@
好,就挑戰下自己...

想成品顏色有大啲對比,
選擇左做原味同抹茶 
(係偏心嘅,我係抹茶控麻 ^^)


蛋糕糊入模時聽人講話好隨意就得架喇,
但出到黎隨意到有啲得少少 :p


睇下...


同埋...
分開左兩個蛋糕糊,
唔知點解成件事好似繁複左好多咁...
fold in 時又粗魯左,
搞到個蛋糕又矮,又鬼死咁多窿窿 > <"


我問老闆 :何解我咁鬼粗魯,溫柔啲得冇?
佢答:下? 全球華人都知你唔溫柔過喎...
我 : 哦... 唔該哂... 好有鼓勵性囉 @@